“არ არის დაჭერილი, თბილისშია“, – ასე უპასუხა ყოფილი პრემიერ-მინისტრის, ირაკლი ღარიბაშვილის ერთ-ერთმა მცველმა მის საცხოვრებელ კორპუსში, ვაკეში, მოსაშვილის ქუჩაზე მისულ ჟურნალისტებს. ღარიბაშვილის შესახებ მას სხვა დამატებით არაფერი უთქვამს, გარდა იმისა, რომ “საკუთარ სახლშია“, „დაცულია“ და „ძალიან კარგად არის“.
„ყველაფერს გაიგებთ. გიპასუხებენ შესაბამის უწყებაში ყველაფერს“, – თქვა ღარიბაშვილის მცველმა.
რამდენიმე საათის წინ, მთავარმა პროკურორმა გიორგი გვარაკიძემ სპეციალურ ბრიფინგზე განაცხადა, რომ ირაკლი ღარიბაშვილის, ასევე, სუს-ის ყოფილი უფროსის, გრიგოლ ლილუაშვილისა, ყოფილი გენერალური პროკურორის, ოთარ ფარცხალაძისა და მათთან დაკავშირებული კიდევ ხუთი ადამიანის სახლებში – 22 ადგილას – ჩხრეკა ჩატარდა.
გვარაკიძის თქმით, “ამოღებულია სხვადასხვა ელექტრონული მოწყობილობები, დოკუმენტაცია და დიდი ოდენობით ფულადი თანხა“.
