რუსეთის ნავთობობიექტზე თავდასხმის შემდეგ, შავ ზღვაში ნავთობი ჩაიღვარა. ამის შესახებ BBC წერს.
გამოცემის თანახმად, ნავთობის ჩაღვრის ფაქტი ტუაფსეს ყურეში დაფიქსირდა, რაც NASA-ს სატელიტურ სურათებზე ჩანს.
BBC-ს ცნობით, თანამგზავრულ სურათებზე ასახულია, რომ პორტის ერთ-ერთი ტერმინალიდან შავ ზღვაში შეინიშნება ნავთობგაჟონვა, რომლის სიგრძეც დაახლოებით 3.6 კილომეტრია.
ცნობისთვის, შაბათ-კვირას გავრცელდა ვიდეო, სადაც ჩანდა, რომ უკრაინამ კრასნოდარის მხარეში, ტუაფსეს პორტში ნავთობგადამამუშავებელ ქარხანას დაარტყა. უცხოური გამოცემა წერს, რომ ლოკაციის დადგენა წინა პლანზე შენობების დათვალიერებით და მათი Google-ისა და Yandex-ის რუკებზე არსებულ სურათებთან შესაბამისობის შემოწმებით მოხდა.
თავდასხმა დაადასტურა რეგიონის ხელისუფლებამაც. მათი ინფორმაციით, თავდასხმის შედეგად საზღვაო სავაჭრო პორტის ნავთობის ჩატვირთვის ინფრასტრუქტურა და პორტში მდგარი 2 უცხოური გემი დაზიანდა.
