მას შემდეგ, რაც რუსმა ოკუპანტებმა კახოვკის ჰიდროელექტროსადგური ააფეთქეს, გაჩნდა კითხვა, მოაღწევს თუ არა დამაბინძურებლები შავი ზღვის საქართველოს სანაპირო ზოლამდე.
მართალია, გარემოს ეროვნული სააგენტოს ინფორმაციით, ჩატარებული ლაბორატორიული კვლევების მიხედვით, ამ დროისთვის, შავი ზღვის წყლის ხარისხი მთელ პერიმეტრზე ნორმის ფარგლებშია, თუმცა დარგის სპეციალისტები ამბობენ, რომ კახოვკის ჰესის აფეთქების შედეგები, საქართველომდე დაახლოებით, ორ თვეში მოაღწევს.
„თეორიულად, ალბათ, საქართველოს ნაპირებთანაც მოაღწევს დამაბინძურებლები (და, არც ასაფეთქებელი საბრძოლო მასალებია გამორიცხული). საერთოდ, შავი ზღვის ზოგადი ცირკულაცია დღეს კარგად არის შესწავლილი, ციკლონური მოძრაობა აქვს მთლიანად შავ ზღვას, ადვილი გასაგები რომ იყოს, საათის ისრის საწინააღმდეგოდ.
დინების სიჩქარე შავ ზღავში საშუალოდ შეიძლება შევაფასოთ, 20-30 სანტიმეტრი წამში, შავი ზღვის სიგრძე კი, ანუ რა მანძილი უნდა გაიაროს დინებამ, დაახლოებით 1200-1300 კმ-ია. ჩვენამდე ეს ალბათ, დაახლოებით თვე ნახევარი – ორ თვეში მოაღწევს“, – განაცხადა თსუ-ს მიხეილ ნოდიას სახელობის გეოფიზიკის ინსტიტუტის მთავარმა მეცნიერმა, ფიზიკა- მათემატიკის მეცნიერებათა დოქტორმა, პროფესორმა დემურ დემეტრაშვილმა „პალიტრანიუსისა“ და რადიო „პალიტრას“ გადაცემაში „საქმე“.