ვფიქრობ, ეს რეალურად არ შეუშლის ხელს ჩვენს ქვეყნებს შორის ურთიერთობას, მაგრამ ჩვენ არ ვართ ის ქვეყანა, რომელსაც შეიძლება ყველაფერი აკადრო.
ჩვენც გვაქვს თავმოყვარეობა და ჩვენც უნდა დავიცვათ ჩვენი პოზიციები, მით უმეტეს, როცა აბსოლუტურად მართლები ვართ, – ამის შესახებ პარლამენტის საპროცედურო საკითხთა კომიტეტის თავმჯდომარემ ირაკლი ქადაგიშვილმა „ქრონიკაში” პოლონეთის საგარეო საქმეთა სამინისტროს განცხადებაზე საუბრისას განაცხადა.
„თვით სტრასბურგის სასამართლოს გადაწყვეტილებაც კი აღარ წარმოადგენს ამ ლობისტური და გარკვეული პოლიტიკური ძალებისთვის შემაკავებელ ფაქტორს. სითავხედის დონე უკვე ამ დონემდე არის ასული. გამომდინარე აქედან, ამ პატარა ქვეყანას გვაქვს ერთადერთი გამოსავალი – სიმართლის საუბარი ყველგან – ქვეყნის შიგნითაც და ქვეყნის გარეთაც. როგორც ყველა ცდილობს თავის ქვეყნის რენომე შეინარჩუნოს, პოლონეთმაც ამ შემთხვევაში, ფაქტზე რომ არაფერი ჰქონდა სათქმელი, აქეთ მაინც შემოგვიტია. ჩვენ იმის უფლება მაინც უნდა დავიტოვოთ, რომ სიმართლე ვთქვათ ხოლმე. არავის ვუტევთ, უბრალოდ ჩვენს გარშემო არსებულ ვითარებაზე სიმართლეს ვლაპარაკობთ”, – განაცხადა ქადაგიშვილმა.
სპეციალურმა პენიტენციურმა სამსახურმა 14 ივლისს მიხეილ სააკაშვილთან პოლონელი ექიმების ვიზიტის შესახებ განცხადება გაავრცელა, სადაც აღნიშნულია, რომ მსჯავრდადებულ სააკაშვილისგან აღებული ნიმუში ერთ-ერთმა პოლონელმა ექიმმა ქაღალდში გადაახვია და ფეხსაცმლის მეშვეობით ცდილობდა მის მალულად გატანას. პოლონელმა ექიმმა ჩამორთმეულ ახსნა-განმარტებაში თავად დაადასტურა მიხეილ სააკაშვილისგან აღებული ნიმუშის წინდაში განთავსებისა და გატანის მცდელობის ფაქტი. პოლონელ მედიკოსთან დაკავშირებული ინციდენტის გამო საქართველოს საგარეო საქმეთა სამინისტროში იმყოფებოდა პოლონეთის ელჩის მოვალეობის შემსრულებელი.
მომხდარს პოლონეთის საგარეო უწყებაც გამოეხმაურა, რომლის განცხადებაში აღნიშნულია: „მიხეილ სააკაშვილთან პოლონელი ექიმების ვიზიტის დროს მომხდარი ინციდენტი განიმარტა საქართველოს საგარეო საქმეთა მინისტრთან შეხვედრისას და ამ კონტექსტში, სპეციალური პენიტენციური სამსახურის გადაწყვეტილება, რომ პოლონელი ექიმის ჩხრეკის ჩანაწერი გამოაქვეყნოს, კარგი თანამშრომლობის პრინციპებს ეწინააღმდეგება”.