რუსეთს შეუძლია გაარღვიოს უკრაინის თავდაცვა და დაიკავოს ახალი ტერიტორიები, – წერს The Hill.
სტატიაში აღნიშნულია, რომ ბოლოს ბაიდენის ადმინისტრაციამ უკრაინას სამხედრო დახმარების პაკეტი დეკემბერში გაუგზავნა და მას შემდეგ რუსეთმა ომში აშკარა უპირატესობა მოიპოვა.
უკრაინა და მისი მოკავშირეები აცხადებენ, რომ არ არის დასაკარგი დრო, კონგრესმა უნდა დაამტკიცოს დახმარება, რადგან უკრაინელები ცდილობენ თავიდან აიცილონ პოტენციურად შეუქცევადი დანაკარგები.
„ამჟამად შემაშფოთებელია ის, რომ თუ დახმარება არ იქნება ძალიან სწრაფად, რუსეთი შეძლებს გაარღვიოს უკრაინული ხაზი და დაიკავოს ტერიტორია. რუსეთი, სავარაუდოდ, დაიკავებს დამატებით ტერიტორიებს და შეიძლება მივიდეს იქამდეც, რომ კვლავ გახდეს რეალური საფრთხე დედაქალაქისთვის“, – განაცხადა მიშელ ფლურნოიმ, რომელიც ობამას დროს თავდაცვის მდივნის მოადგილედ მუშაობდა.
გამოცემის ცნობით, მიუხედავად იმისა, რომ დემოკრატებმა დიდწილად მხარი დაუჭირეს ჯონსონის საგარეო დახმარების წინადადებას, კანონპროექტის შემადგენელ ნაწილებად დაშლამ, შეიძლება შეანელოს პროცესი კვირებით და გადადოს იარაღის მიწოდება ორი თვით.
„არსებითად, რასაც ახლა ვხედავთ ბრძოლის ველზე არის ის, რომ რუსები სარგებლობენ ამ დახმარების ნაკლებობით… “, – აღნიშნა ომის კვლევის ინსტიტუტის ანალიტიკოსმა კატერინა სტეპანენკომ.
მისი თქმით, რუს სამხედროებს შეუძლიათ აირჩიონ, როდის და სად შეუძლიათ უკრაინაზე თავდასხმა და აძლიერებენ პოზიციებს, რათა კიდევ უფრო გაურთულონ უკრაინელებს ინიციატივის დაბრუნება.
სტატიის ავტორების თქმით, არტილერია, საბრძოლო მასალა და საჰაერო თავდაცვის სისტემები განიხილება პრიორიტეტულად, მაგრამ შეტევითი ოპერაციების ჩასატარებლად, ასევე, გადამწყვეტია თანამედროვე საბრძოლო აღჭურვილობა.
რესპუბლიკელებმა უკრაინის დახმარების პაკეტში, ასევე, შეიტანეს მოთხოვნა, რომ ბაიდენის ადმინისტრაციამ უკრაინას უნდა გაუგზავნოს შორი დისტანციის რაკეტები, ან ATGM, მაგრამ იმ პირობით, რომ პრეზიდენტს შეუძლია უარი თქვას მასზე, თუ ასეთი იარაღის მიწოდება დააზარალებს აშშ-ის უსაფრთხოებას. რაკეტები საშუალებას მისცემს უკრაინას დაარტყას რუსეთის სამხედრო ობიექტებს რუსეთის ტერიტორიაზე.