ჯერ გთავაზობთ ინფორმაციას საინფორმაციო სააგენტო “აიპიენიდან”, შემდეგ კი, თუ მანამ ვერ მიხვდით, რატომ არის სტატია ასეთი მძაფრი სათაურით დასათაურებული, ამასაც აგიხსნით:
ზოგადად, სახელმწიფოსთვის ყველაზე საშიში საშუალო ინტელექტისა და ცოდნის მქონე ადამიანების დომინირებაა, რასაც დანინგ-კრუგერის თეორიაც ადასტურებს; ამ თეორიის თანახმად, საშუალო ინტელექტისა და ცოდნის მქონე ადამიანს ახასიათებს თავდაჯერებულობის ყველაზე მაღალი ხარისხი, – ამის შესახებ საქართველოს პრემიერ-მინისტრმა ირაკლი კობახიძემ ღია წერილში აღნიშნა, რომლითაც, მისი თქმით, გულწრფელ ახალგაზრდებს მიმართავს.
პრემიერი საუბრობს ერთ-ერთი მისთვის ნაცნობი გულწრფელი ახალგაზრდის „ფეისბუკ“ პოსტების შესახებ, რომელსაც „უცხოური გავლენის გამჭვირვალობის შესახებ“ კანონპროექტი არ წაუკითხავს, თუმცა სწამს, რომ კანონი რუსულია.
„ეს ჩვენი გულწრფელი ახალგაზრდა დღესაც აქციაზე დგას. არც ქართული კანონი წაუკითხავს და მით უმეტეს, არც რუსული, თუმცა, აქვს რწმენა, რომ ქართული კანონი რუსულია. ხშირად აზიარებს ხოლმე ილიას უნივერსიტეტის ასოცირებული პროფესორების და „ენჯეოშნიკების“ ვიდეოებს, სადაც ეს ადამიანები ათას ტყუილს ამბობენ. ის კი, ამ ყველაფერს არც ამოწმებს, რადგან მისთვის ილიას უნივერსიტეტის ასოცირებული პროფესორიც და „ენჯეოშნიკიც“ ღმერთის სწორია, რომლის სიტყვასაც გადამოწმება საერთოდ არ სჭირდება. ამ ყველაფრის ფონზე, დღის წესრიგში დგება საკითხი: ვის უნდა გაჰყვეს ხელისუფლება – საშუალო ინტელექტის მქონე ამ გულწრფელ ახალგაზრდას და მის თანამოაზრეებს, თუ იმ ახალგაზრდა, საშუალო ასაკის და ასაკოვან ჩვენს თანამოქალაქეებს, რომლებიც გასული 3 წლის მანძილზე მოვლენებს სწორად აანალიზებდნენ, არცერთ ხელოვნურად შემოგდებულ პროვოკაციას არ აყვნენ და სახელმწიფოს სიმყარის შენარჩუნებაში დაეხმარნენ?“ – აცხადებს პრემიერი.
მთავრობის მეთაური ერთი თვის წინ ჩატარებულ კვლევაზე საუბრობს, რომლის ფარგლებშიც გამოიკითხა, ამომრჩევლის რამდენი პროცენტი უჭერდა მხარს „ქართულ ოცნებას“ ინტელექტის დონის მიხედვით.
„რესპონდენტების ინტელექტი, ანუ IQ შევამოწმეთ და ისინი მაღალი, საშუალო და დაბალი ინტელექტის კატეგორიებად დავყავით. კვლევით დადგინდა, რომ „ქართულ ოცნებას“ მარტში ამომრჩევლის 61,3 პროცენტი უჭერდა მხარს. ამასთან, მაღალი ინტელექტის მქონე ამომრჩეველში ჩვენი მხარდაჭერა 73,8 პროცენტი იყო, ხოლო საშუალო ინტელექტის მქონე ამომრჩეველში – მხოლოდ 45,6 პროცენტი. ზოგადად, სახელმწიფოსთვის ყველაზე საშიში საშუალო ინტელექტისა და ცოდნის მქონე ადამიანების დომინირებაა, რასაც დანინგ-კრუგერის თეორიაც ადასტურებს. ამ თეორიის თანახმად, საშუალო ინტელექტისა და ცოდნის მქონე ადამიანს ახასიათებს თავდაჯერებულობის ყველაზე მაღალი ხარისხი. ადამიანს, რომელსაც კანონი არ წაუკითხავს, მაგრამ ილიას უნივერსიტეტის ასოცირებული პროფესორისგან და ოკეანის გაღმიდან მოისმინა, რომ ეს კანონი რუსულია, ყველაზე მყარად სწამს, რომ მის მიერ წაუკითხავი კანონი ცუდია. გულწრფელობას რაც შეეხება, მას მხოლოდ მაშინ აქვს ფასი, როდესაც ის ცოდნითა და ინტელექტით არის გამყარებული. ცოდნისა და ინტელექტის არმქონე და თავდაჯერებული ადამიანი რუსულ ტანკზე უარესია“, – აცხადებს პრემიერ-მინისტრი.
ახსნა იმისა, თუ რატომ არსებობს ეჭვი, რომ პრემიერს “შიგ” აქვს:
პირველი. ზის და ვიღაც სულელის ფეისბუკ-ნაბოდვარს კითხულობს და მერე კომენტარს კი არა და, მთელ “ანალიტიკას”უძღვნის;
მეორე. არ იშლის რუსეთით ხალხის დაშინებას და კიდევ “რუსულ ტანკს” ახსენებს, როგორც ჰიპოთეტურ საფრთხეს;
მესამე და მთავარი: თავისი ქოც-პარტიის მხარდამჭერებს თუ პოტენციურ ამომრჩეველს აყენებს შეურაცხყოფას, როდესაც მათ, თავისი მოკლე ჭკუით, ინტელექტს “უზომავს”! როგორ დაიყოლია თავისი მხარდამჭერები ამგვარი ტესტის გავლაზე ან რა მეთოდიკით ჩაატარა მსგავსი გამოკითხვა, მისი საიდუმლოა. ამიტომ, უკეთეს შემთხვევაში, კობახიძე რჩება ფეხსალაგად გადაქცეული თსუ-ს წვრილფეხა ლექტორად, უარეს შემთხვევაში კი – იხილეთ სტატიის სათაური, რომელიც სპეციალურად შევარჩიეთ, რათა ნაკლები “აიქიუს” მქონე მოქალაქეებმაც დაინახონ თავიანთი პრემიერის რეალობისგან მოწყვეტილობა.