BILD-ის ანალიტიკოსი ჯულიან როპკე იტყობინება, რომ შეტევის დროს რუსებმა 2,5 კმ-ით წაიწიეს დონეცკის ოლქის ქალაქ ტორეცკის ცენტრისკენ და ახლა აკონტროლებენ ქალაქის ტერიტორიის დაახლოებით 70%-ს.
ანალიტიკოსის თქმით, უკრაინის შეიარაღებულმა ძალებმა ტორეცკის ცენტრიდან რუსების გაძევება, მრავალი მცდელობის მიუხედავად, ვერ მოახერხეს.
„უკვე რამდენიმე კვირაა, უკრაინის შეიარაღებული ძალები ჩრდილოეთიდან და სამხრეთიდან ფლანგური თავდასხმებით ცდილობენ, რუსული შეტევა შეწყვიტონ. სასტიკი ქუჩის ბრძოლები მიმდინარეობს ყველა საცხოვრებელი შენობისთვის. შედეგად, ქალაქი, სადაც ოდესღაც 50 000-მდე ადამიანი ცხოვრობდა, ნანგრევებად იქცა“, – წერს როპკე.
ამასთან, ანალიტიკოსის თქმით, უკრაინის შეიარაღებული ძალები ვერ ახერხებენ კონტრშეტევის განხორციელებას, ალყაში მოქცევას და რუსების განდევნას ტორეცკის ცენტრში მდებარე საცხოვრებელი კორპუსებიდან. ოკუპანტები ახლა აკონტროლებენ ქალაქის დაახლოებით 70%-ს, მათ შორის ცენტრალურ ქუჩას.
