„ქართულ ოცნებას“ არავითარი ევროპული გზიდან არ გადაუხვევია! -თეთრზე შავით გვიმტკიცებენ, რომ დსთ-ს წევრი ქვეყანა თურმე ნათელ ფერებშია, საქართველო კი ბნელში. გახსოვთ, ეს განცხადება, რომელიც ბორელმა გააკეთა. ეს არის ევროპული სამართლიანობა?! – ამის შესახებ “ქართული ოცნების” გენერალურმა მდივანმა, დედაქალაქის მერმა, კახა კალაძემ თბილისის საკრებულოში სხდომაზე განაცხადა, სადაც კახა კალაძე მერიის წლიურ ანგარიშს წარადგენს.
როგორც კალაძემ განმარტა, ამ თემით მუდმივი შანტაჟი და მანიპულაციები მიუღებელია.
„ცხადია, არ დავუშვებთ არეულობას, ომს, ქვეყნის ინტერესების გაყიდვას, არც შიდა ძალების მცდელობით და არც გარე ძალების კარნახით. ეს არასდროს მოხდება, კარგად უნდა შეიგნონ ეს როგორც ქვეყნის შიგნით ამ წვრილფეხა რადიკალებმა, ასევე ქვეყნის გარეთ მათმა პატრონებმა. მოსახლეობის გასაგონად კიდევ ერთხელ განვმარტავ, რომ „ქართულ ოცნებას“ არავითარი ევროპული გზიდან არ გადაუხვევია. „ქართული ოცნება“ ის ძალაა, რომელმაც ყველაზე მეტად დაგვაახლოვა ევროპასთან. ყველა წინ გადადგმული ნაბიჯი ევროინტეგრაციის გზაზე უკავშირდება „ქართული ოცნების“ ხელისუფლების პერიოდს. ცხადია, გვინდა ევროპა. ეს არავის აძლევს უფლებას ამ მიზნის ვიწრო პოლიტიკური ინსტრუმენტალიზაცია მოახდინოს, ჩვენი ქვეყნის წინააღმდეგ შანტაჟის იარაღად გამოიყენოს. ევროკავშირში გაწევრიანების მიზანი არავინ უნდა დაამსგავსოს სატყუარას, რომლის მეშვეობით ჩვენს გაბითურებას შეეცდებიან პატარა ბავშვებივით.
გავიხსენოთ კანდიდატის სტატუსის მოცემა-არმოცემის საკითხი. როგორ გვაშანტაჟებდნენ და გვაყენებდნენ შეურაცხყოფას. ტყუილით გაჯერებული შეტყობინებები, რომელსაც ვისმენდით გარედან კონკრეტული პოლიტიკოსების მხრიდან. სიმართლეს მოწყვეტილი განცხადებები იყო. სამწუხაროდ, დღეს საქართველო ისევ დასაჯეს. ახალი მოიფიქრეს, მოლაპარაკების გახსნა-არ გახსნა. თეთრზე შავით გვიმტკიცებენ, რომ დსთ-ს წევრი ქვეყანა თურმე ნათელ ფერებშია, საქართველო კი ბნელში. გახსოვთ, ეს განცხადება, რომელიც ბორელმა გააკეთა. ეს არის ევროპული სამართლიანობა?! რიტორიკული კითხვაა, პასუხი პრემიერის განცხადებაა, როდესაც მივიღეთ გადაწყვეტილება მთელი პასუხისმგებლობა დაეკისროს ევროკავშირის უწყებებს.
დღეს მათ შეუძლიათ თავისუფლად გახსნან მოლაპარაკებები, საქართველოს ხელისუფლება მზად არის ხელი მოაწეროს აღნიშნულ დოკუმენტს. თუმცა, ამ თემით მუდმივი შანტაჟი და მანიპულაციები მიუღებელია“, – აღნიშნა კალაძემ.
