აშშ-ის პრეზიდენტმა, დონალდ ტრამპმა სოციალურ ქსელში გააზიარა ხელოვნური ინტელექტის მიერ გენერირებული ვიდეო, რომელიც ასახავს ტრამპის ხედვას ღაზას მომავლის შესახებ.
30-წამიანი ვიდეორგოლი იწყება ომისგან განადგურებული ღაზის ჩვენებით. ეს სცენა კი მოულოდნელად იცვლება და ჩანს, რომ ეს ადგილი მზიან კურორტად გარდაიქმნება.
“დონალდ ტრამპი ათავისუფლებს – აღარ არის გვირაბები, აღარ არის შიში, ტრამპის ღაზა საბოლოოდ აქ არის“, – ასეთია ვიდეოს აღწერა.
ვიდეოში ჩანს ოქროს “Trump Gaza” შენობა, ისევე როგორც ტრამპის ოქროს ქანდაკება.
ნაჩვენებია თანამედროვე სანაპირო ზოლი, რომელიც გაფორმებულია პალმებით, მოსასვენებელი სივრცითა და მაღალსართულიანი შენობებით.
ვიდეოს ერთ მომენტში დონალდ ტრამპი მოცეკვავე ქალთან ერთად ერთობა, ერთგან კი ბენიამინ ნეთანიაჰუსთან ერთად ირუჯება.
შეგახსენებთ, რომ ცოტა ხნის წინ, აშშ-ის პრეზიდენტმა, დონალდ ტრამპმა განაცხადა, რომ ღაზის შეძენას აპირებს. მისი თქმით, ტერიტორია უნდა გადაიქცეს განვითარებულ რეგიონად, სადაც მსოფლიოს სხვადასხვა კუთხიდან შეძლებენ ადამიანები ცხოვრებას.
“ვაპირებ ღაზის შეძენასა და ფლობას. რაც შეეხება მის აღდგენას, შესაძლოა, ახლო აღმოსავლეთის სხვა სახელმწიფოებს მივცეთ მისი ცალკეული ნაწილების აშენების უფლება, ჩვენი მეთვალყურეობის ქვეშ. თუმცა ჩვენ გვსურს მისი ფლობა, აღება და იმის უზრუნველყოფა, რომ “ჰამასი“ უკან არ დაბრუნდეს”, – განაცხადა ტრამპმა.
