აშშ-ის მთავრობის ეფექტიანობის დეპარტამენტის ყოფილი ხელმძღვანელი, ილონ მასკი აკრიტიკებს კანონპროექტს, რომელსაც აშშ-ის პრეზიდენტი დონალდ ტრამპი “დიდ და მშვენიერ კანონპროექტს” უწოდებს.
ილონ მასკის თქმით, ეს კანონპროექტი, რომელიც წარმომადგენელთა პალატამ გასულ თვეში მიიღო, “ამაზრზენი სისაძაგლეა”
“სირცხვილი მათ, ვინც ამ კანონპროექტს ხმა მისცა”, – წერს ილონ მასკი X-ზე.
- ცნობისთვის მილიარდერმა ტრამპის ადმინისტრაცია გასულ კვირას დატოვა. ის DOGE-ის (მთავრობის ეფექტიანობის დეპარტამენტი) ხელმძღვანელად 129 დღე მუშაობდა.
მასკის ეს განცხადება პირველი საჯარო კომენტარია თეთრი სახლის დატოვების შემდეგ, რომელიც მისი და დონალდ ტრამპის უთანხმოებას უსვამს ხაზს. მანამდე კი მან ტრამპის გეგმას აღნიშნული კანონპროექტის მიღებასთან დაკავშირებით, “იმედგაცრუება” უწოდა.
- თეთრ სახლში მიიჩნევენ, რომ კანონპროექტის საშუალებით ბიუჯეტში არსებული დეფიციტი აღმოიფხვრება – უფრო კონკრეტულად კი შემცირდება სხვაობა მთავრობის დანახარჯებსა და შემოსავალს შორის. სხვაობა შემცირდება დაახლოებით 600 მილიარდი დოლარით მომდევნო ფისკალურ წელს.
თუმცა ამ მოსაზრებას არ ეთანხმება მასკი და თვლის, რომ კიდევ უფრო გაიზრდება ბიუჯეტში არსებული ისედაც გიგანტური დეფიციტი და დამძიმდება ამერიკის მოქალაქეების ფინანსური მდგომარეობა.
- მასკის კრიტიკას მალევე უპასუხეს თეთრ სახლში. განცხადება გააკეთა თეთრი სახლის პრესმდივანმა ქეროლაინ ლევიტმა. მისი თქმით, პრეზიდენტმა უკვე ისედაც იცოდა, თუ რა პოზიცია აქვს ილონ მასკს ამ კანონპროექტთან დაკავშირებით.
“ეს არის დიდი, ლამაზი კანონპროექტი და პრეზიდენტი იცავს მას”, – აცხადებს ლევიტი.
-
რას ითვალისწინებს გადასახადებთან დაკავშირებული კანონპროექტი და რატომ გახდა ის ტრამპსა და მასკს შორის დაპირისპირების მიზეზი?
კანონპროექტის მიხედვით, გახანგრძლივდება დონალდ ტრამპის პრეზიდენტობის პირველი ვადის დროს მიღებული საგადასახადო შეღავათები და ასევე შესრულდება ტრამპის წინასაარჩევნო დაპირებები. მათ შორის, დაპირება ზეგანაკვეთური შრომის დაბეგვრის გაუქმების შესახებ, ასევე ის ითვალისწინებს ასობით მილიარდი დოლარის გამოყოფას თავდაცვისა და იმიგრაციასთან დაკავშირებული დაპირების აღსრულებისთვის.
- კანონმდებლობა აუქმებს ჯო ბაიდენის დროს მიღებულ “ინფლაციის შემცირების აქტს”, რომელიც ითვალისწინებდა ფედერალურ საგადასახადო წახალისებას ელექტრომობილების, ბატარეების და მზის ენერგიის წარმოებისთვის, რაც არის ილონ მასკის ბიზნესის საყრდენია.
კანონპროექტის ძირითადი მიზანია 2017 წლის “საგადასახადო შეღავათებისა და დასაქმების აქტის” ზოგიერთი მუხლის გაგრძელება, რომელსაც ტრამპმა პირველი ვადის განმავლობაში მოაწერა ხელი და რომლის ვადაც წლის ბოლოს იწურება. როგორც The Washington Post წერს, თუ კანონპროექტს არ მიიღებენ, პრაქტიკულად ყველა გადამხდელი უფრო მეტ გადასახადს გადაიხდის. ასევე დოკუმენტი ითვალისწინებს 150 მილიარდი დოლარის გამოყოფას იმიგრაციის კონტროლისთვის, რაც ტრამპის ადმინისტრაციის ერთ-ერთი პრიორიტეტია.
საგადასახადო შეღავათების გაგრძელების დასაფინანსებლად კანონპროექტი გაამკაცრებს “სახელმწიფო სამედიცინო დახმარების პროგრამაში” ჩართვის კრიტერიუმებს. ეს კი როგორც კონგრესში აცხადებენ, მილიონობით ადამიანს დაზღვევის გარეშე დატოვებს.
გარდა ამისა, კანონპროექტი მილიარდობით დოლარის ხარჯს დაუკავშირებს SNAP-ს, კვების დახმარების ფედერალურ პროგრამას და ამ ხარჯებს შტატებზე გადაანაწილებს. ამის გამო ადგილობრივმა ხელისუფლებებმა შესაძლოა, მნიშვნელოვნად გაზარდონ გადასახადები, ან მიიღონ ზომები, რომელიც უამრავ ოჯახს ამ პროგრამიდან ამოაგდებს.