ირანის ერთ-ერთი უძველესი ბუშერის ატომური ელექტროსადგური ისრაელის საჰაერო იერიშების დროს არ დაზიანებულა. ინფორმაციას ატომური ენერგიის საერთაშორისო სააგენტო ავრცელებს.
მათი თქმით, აგრეთვე არ ფიქსირდება რადიაციის დონის მატება ირანის ნეთენზის რაიონში, სადაც ერთ-ერთი ბირთვული ობიექტია განლაგებული, და რომელიც ისრაელმა დაბომბა.
„ირანის ხელისუფლებამ ატომური ენერგიის საერთაშორისო სააგენტოს აცნობა, რომ ბუშერის ატომური ელექტროსადგური არ დაზიანებულა და აგრეთვე რადიაციის დონის მატება ნეთენზის რაიონში არ ფიქსირდება“, – აღნიშნულია განცხადებაში.
ცნობისთვის, ისრაელმა გამთენიისას ირანის წინააღმდეგ სამხედრო ოპერაცია, სახელწოდებით „ლომთა ერი“ დაიწყო. ოპერაციის ფარგლებში დაიბომბა ირანის ბირთვული ობიექტები, ლიკვიდირებულია ირანის უმაღლესი სამხედრო თანამდებობის პირები და მეცნიერ-ფიზიკოსები, რომლებიც ბირთვულ პროგრამაზე მუშაობდნენ.
