აშშ-ის სახელმწიფო მდივანი მარკო რუბიო დღეს, 11 ივლისს, კუალა-ლუმპურში ჩინეთის საგარეო საქმეთა მინისტრს ვანგ იის შეხვდა, რაც მათი პირველი პირისპირ შეხვედრა იყო ორ მთავარ ძალას შორის სავაჭრო დაძაბულობის ფონზე. ამის შესახებ სააგენტო Reuters-ი წერს.
ვაშინგტონის მთავარი დიპლომატი თანამდებობაზე დანიშვნის შემდეგ აზიაში პირველი ვიზიტით მალაიზიაში იმყოფება, სადაც იაპონიის, ჩინეთის, სამხრეთ კორეის, რუსეთის, ავსტრალიის, ინდოეთის, ევროკავშირისა და სამხრეთ-აღმოსავლეთ აზიის სახელმწიფოების კოლეგებთან ერთად აღმოსავლეთ აზიის სამიტსა და ASEAN-ის რეგიონულ ფორუმს ესწრება.
ვანგთან მისი შეხვედრა აშშ-ის პრეზიდენტ დონალდ ტრამპის მიერ ჩინეთისთვის დაწესებული ტარიფების გამო გლობალურად მზარდი დაძაბულობის ფონზე გაიმართა, რადგან ამ კვირაში ჩინეთმა აშშ გააფრთხილა, რომ მომავალ თვეში მის საქონელზე მაღალი გადასახადები არ აღდგეს.
პეკინი ასევე დაიმუქრა, რომ საპასუხო ზომებს მიმართავს იმ ქვეყნების წინააღმდეგ, რომლებიც ჩინეთის მიწოდების ჯაჭვებიდან გამორიცხვის შესახებ შეერთებულ შტატებთან შეთანხმებებს დადებენ.
აღსანიშნავია, რომ ამ კვირაში აშშ-მა განაცხადა, რომ აზიის რამდენიმე ქვეყანას მაღალ ტარიფებს უწესებს. კერძოდ, ეს მოიცავს 25%-იან ტარიფებს იაპონიაზე, სამხრეთ კორეასა და მალაიზიაზე, 32%-იან ტარიფებს ინდონეზიაზე, 36%-იან ტარიფებს ტაილანდსა და კამბოჯაზე, 40%-იანს კი მიანმარსა და ლაოსზე.
ჩინეთის საგარეო საქმეთა მინისტრმა ვანგმა კუალა-ლუმპურში შეერთებული შტატები მკაცრად გააკრიტიკა და მალაიზიის საგარეო საქმეთა მინისტრს განუცხადა, რომ აშშ-ის ტარიფები „ტიპური ცალმხრივი დაშინების ქცევაა“, რომელსაც არცერთმა ქვეყანამ არ უნდა დაუჭიროს მხარი, ან არ უნდა დაეთანხმოს, ნათქვამია პეკინის მიერ 11 ივლისს გამოქვეყნებულ განცხადებაში.
მან ტაილანდელ კოლეგას განუცხადა, რომ ტარიფები ბოროტად გამოიყენეს და ის „ძირს უთხრის თავისუფალი ვაჭრობის სისტემას და ხელს უშლის გლობალური წარმოებისა და მიწოდების ჯაჭვის სტაბილურობას“. კამბოჯელ კოლეგასთან შეხვედრისას მან განაცხადა, რომ აშშ-ის მიერ დაწესებული გადასახადები სამხრეთ-აღმოსავლეთ აზიის ქვეყნებისთვის განვითარების ლეგიტიმური უფლების ჩამორთმევის მცდელობას წარმოადგენს.
„ჩვენ გვჯერა, რომ სამხრეთ-აღმოსავლეთ აზიის ქვეყნებს აქვთ უნარი, გაუმკლავდნენ რთულ სიტუაციებს, დაიცვან პრინციპული პოზიციები და დაიცვან საკუთარი ინტერესები“, – განაცხადა ვანგმა.
ჩინეთის საგარეო უწყების ხელმძღვანელთან შეხვედრამდე რუბიომ ჟურნალისტებს განუცხადა, რომ ის ვანგთან, სავარაუდოდ, განიხილავს აშშ-ის შეშფოთებასაც, უკრაინის წინააღმდეგ ომში ჩინეთის მიერ რუსეთის მხარდაჭერის გამო.
როგორც Reuters-ი წერს, ჩინეთს, რომლის მიმართაც თავდაპირველად 100%-ზე მეტი ტარიფები დაწესდა, თეთრ სახლთან შეთანხმების მისაღწევად ვადა 12 აგვისტომდე აქვს ვადა.
