“ეს არის “ქართული ოცნების” ზონდერი, რომელიც მომიხსენიებს ისეთი სიტყვებით, რომლებსაც ტელევიზიები საჯარო სივრცეში ვერ გაუშვებენ”, – წერდა ორი დღის წინ ჟორჟოლიანი.
“გადავწყვიტე, რომ მათი ენით ველაპარაკო. ჯერ დავიწყოთ იქიდან, რომ ცრუ ჩვენება მისცა, რომლის შემდეგაც დააკავეს პატრიოტი ადამიანები, შესაბამისად, მაინტერესებს ტესტი ჩავუტარო ქართულ მართლმსაჯულებას, რომ მაშინ, როდესაც მე ბატის სმაილისთვის დამაჯარიმეს, მაინტერესებს როგორ იქცევა სახელმწიფო, შინაგან საქმეთა სამინისტრო, როცა მათი ტიტუშკები ასე მოგვმართავენ ჩვენ. ნანუკას ხსენებით ინგეიჯმენტის მომატებით და “ქოცების” გაპოპულარულებით დავიღალე. ნანუკას თუ ახსენებს ასეთი უმორალო ადამიანი, ჩათვლის, რომ ამით უფრო მეტ ქულას დაიწერს ქართული ოცნების ლიდერშიფში. იმ სიტყვებს, რითაც მე ის პირდაპირ ეთერში მომმართავს, მე მას არ ვაპატიებ, გამორიცხული ამბავია და შესაბამისად, მაინტერესებს რა ტესტს ჩააბარებს ახლა შინაგან საქმეთა სამინისტრო, როდესაც მათი ტიტუშკა დასაჯარიმებელი ეყოლებათ,” – განაცხადა ჟურნალისტმა “TV პირველთან”.
შეგახსენებთ, რომ ბექა გოცირიძის მიმართვის საფუძველზე, 1 -ლ აგვისტოს შსს-მ აქციის ორი მონაწილე თორნიკე თოშხუა და მინდია შერვაშიძე, დააკავა.
დაკავების საფუძვლად ბექა გოცირიძის ჩვენება და აქციაზე გადაღებული ვიდეომასალა დასახელდა. კადრებში ჩანს, რომ გოცირიძე ჯერ სიტყვიერად უპირისპირდება აქციის მონაწილეებს, შემდეგ კი ჩხუბი იწყება. აქტივისტები აცხადებენ, რომ გოცირიძემ პროვოკაცია დადგა და მათ მიერ გადაღებულ მასალაში მისი ცივი იარაღიც ჩანს, თუმცა შსს-ს მიერ გავრცელებული ვიდეოდან ეს ეპიზოდი ამოჭრილია.
იურისტმა საბა ბრაჭველმა სოციალურ ქსელში დაწერა: “ბექა გოცირიძე ჯიბეში დანით და ხმამაღალი გინებით რუსთაველზე მივიდა, ჩხუბი თვითონ ატეხა, და პოლიციამ კი ის ადამიანები დაიჭირა, ვინც მას დანა წაართვეს”.
აღსანიშნავია, რომ ინციდენტის შემდეგ გოცირიძემ “ტიკტოკზე“ განაცხადა, რომ მისი ცემა ვერ მოახერხეს, თუმცა მოგვიანებით პოზიცია შეცვალა და თავი დაზარალებულად გამოაცხადა.
გოცირიძე ყოფილი ფეხბურთელია, მას ეროვნული ნაკრებში 12 მატჩში 1 გოლი აქვს გატანილი. მან კარიერა “ამერში” დაიწყო. შემდეგ იყო “ზესტაფონი”, უკრაინულ “დნიპროში” თამაშისას, ავტოავარიაში მოყვა და მისი კარიერა უკან წავიდა…
ამის მერე მოედანზე დაბრუნების მცდელობა ჰქონდა და რამდენიმე კლუბში იასპარეზა კიდეც, თუმცა – წარუმატებლად.
