„ყაზახები და ყირგიზები თვითონ დაკავდნენ ქართველი დილერების გარეშე ავტო იმპორტით, მოგებაც მეტი ნახეს და ჩვენი ბაზრის მიმართ მათი დაინტერესება დიდია“, – ასე პასუხობს „ბიზნესპრესნიუსის“ კითხვას ავტოიმპორტიორთა ასოციაციის ხელმძღვანელი ალექსი ნონიაძე, იმასთან დაკავშირებით, თუ რატომ გაიზარდა ყირგიზეთში საქართველოდან მსუბუქი ავტომობილების ექსპორტი.
ინფორმაციისთვის, ავტომობილების ექსპორტის კუთხით მთავარი სავაჭრო ბაზარი ყირგიზეთია. კერძოდ, წელს ყირგიზეთში 759.1 მილიონი დოლარის (23 624 ერთეული) ავტომობილები გავიდა. ამასთანავე, მხოლოდ ყირგიზეთში იანვარ-ივლისში წლიურად 40%-ით არის გაზრდილი ავტომობილების ექსპორტი. უფრო დეტალურად, შარშან შვიდ თვეში ექსპორტირებულია 538.8 მილიონი დოლარის (15 059 ავტომობილი).
როგორც ნონიაძე განმარტავს, საქართველო ცენტრალური აზიის ქვეყნებისთვის ავტომობილების კუთხით ჩინეთთან და დუბაისთან ერთად, მნიშვნელოვანი მომმარაგებელია.
მისი თქმით, მას შემდეგ რაც ყირგიზეთისა და ყაზახეთის მოქალაქეებმა დაიწყეს საქართველოში ავტომობილების იმპორტი, შემდეგ კი ექსპორტი, ცენტრალური აზიის ქვეყნებიდან, მათ შორის ყირგიზეთიდან, მოთხოვნა გაიზარდა, რაც თავისთავად აისახა ექსპორტში.
„ჩვენ ცენტრალური აზიის ქვეყნებისთვის ერთ-ერთი, მაგრამ არა ერთადერთი, ალტერნატივა ვართ. არ არის გამორიცხული რომ იმ რამდენიმე მომარაგების მარშრუტებიდან შესაძლოა, მოთხოვნა უფრო გაიზარდა ჩვენი მიმართულებით. ყირგიზეთში, ყაზახეთში, ცენტრალური აზიის ქვეყნებში შედის ავტომობილები დუბაიდან, ჩინეთიდან და საქართველოდან. ეს ქვეყნები ძალიან დიდ კონკურენციას გვიქმნიდნენ. მას შემდეგ რაც ყაზახები და ყირგიზები თვითონ დაკავდნენ ქართველი დილერების გარეშე ამ ბიზნესით, მოგებაც მეტი ნახეს და ჩვენი ბაზრის მიმართ მათი დაინტერესება ბევრად მეტია, ვიდრე შესაძლოა იყოს აზიის ქვეყნების მიმართულებებიდან. ძირითადი როგორც გითხარი, სამი მიმართულებაა: საქართველო – სადაც ევროპული და ამერიკული ავტომობილები შედის, ჩინეთი და დუბაი. მას შემდეგ, რაც თვითონ ქართველი დილერების გარეშე დაიწყეს ბიზნესის წარმოება, მოგება მეტი რჩებათ და შესაბამისად, ამ მიმართულებაზე დაინტერესება დიდია და მოთხოვნაც გაიზარდა“, – განაცხადა „ბიზნესპრესნიუსთან“ ალექსი ნონიაძემ.
შეგახსენებთ, სტატისტიკის ეროვნული სამსახურის მონაცემები აჩვენებს, რომ იზრდება როგორც მსუბუქი ავტომობილების იმპორტი, ისე ექსპორტი. კერძოდ, 2025 წლის იანვარ-ივლისში ექსპორტზე გავიდა 1.479 მილიარდი დოლარის ღირებულების ავტომობილები (ჯამში 60 442 ერთეული). ეს კი მაშინ, როცა წინა წლის იმავე პერიოდში ექსპორტირებულია 1.193 მილიარდი დოლარის ღირებულების მსუბუქი ავტომობილები (სულ 57 323 ერთეული).
რაც შეეხება იმპორტის, 2024 წლის იანვარ-ივლისში საქართველოში იმპორტირებულია 1.879 მილიარდი დოლარის ღირებულების 118 293 ავტომობილი. წელს იმავე პერიოდში ქვეყანაში შემოვიდა 125 296 ერთეული მსუბუქი ავტომობილი, რომლის ჯამური ღირებულებაც 2.058 მილიარდ დოლარს აჭარბებდა. მიუხედავად ექსპორტ-იმპორტის ზრდისა, ადგილობრივი ავტოდილერები სექტორში არსებულ პრობლემებზე საუბრობენ.
