თბილისში ორი ახალი საბაგირო ხაზი მოეწყობა – ამის შესახებ დედაქალაქის მერმა კახა კალაძემ თბილისის ტრანსპორტისა და ურბანული განვითარების პოლიტიკის პრეზენტაციაზე განაცხადა.
მერიის ინფორმაციით, „საბაგიროს ორი ახალი ხაზი აშენდება. სარაჯიშვილი-ზღვის უბნის ხაზი, რომელიც ახალ პარკს უმოკლესი გზით დააკავშირებს მეტრო სარაჯიშვილთან. ეს საბაგირო დღეში 22 ათას მგზავრს მოემსახურება.
ისანი-ვაზისუბნის ახალი საბაგირო კი, ვაზისუბანსა და მეტრომშენს, მეტრო ისანთან დააკავშირებს. საბაგირო დღეში 35 ათას მგზავრს მოემსახურება.
ეს სიახლე გააუმჯობესებს ქალაქის ეკოლოგიურ მდგომარეობას და გაამარტივებს უბნებს შორის გადაადგილებას“, – აღნიშნულია მერიის ინფორმაციაში.
ცნობისათვის, ამ დროისთვის თბილისში 3 საბაგირო ხაზი მოქმედებს, ესენია – კუს ტბის საბაგირო, რიყის პარკის საბაგირო, უნივერსიტეტი-ბაგების საბაგირო.
