საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჟოზეფ ბორელმა განაცხადა, რომ ბელარუსში ავიაკომპანია Ryanair-ის თვითმფრინავის იძულებით დაშვებასთან დაკავშირებით საერთშორისო გამოძიება უნდა ჩატარდეს.
„ეს ბელარუსის ხელისუფლების მორიგი აშკარა მცდელობაა, გააჩუმოს ყველა ოპოზიციური ხმა. ბატონ პროტასევიჩის დაუყოვნებლივ გათავისუფლებას ვითხოვთ. ამ იძულებითი ქმედების განხორციელებისას ბელარუსის ხელისუფლებამ საფრთხე შეუქმნა მგზავრებისა და ეკიპაჟის უსაფრთხოებას. ამ ინციდენტთან დაკავშირებით საერთაშორისო გამოძიება უნდა ჩატარდეს საერთაშორისო საავიაციო წესების ნებისმიერი დარღვევის დასადგენად. აღნიშნულ საკითხს ევროკავშირის საბჭოს უახლოეს შეხვედრაზე განვიხილავთ. ევროკავშირი ამ ქმედების შედეგებს, მათ შორის პასუხისმგებელი პირების წინააღმდეგ ზომების მიღებას განიხილავს“, – განაცხადა ჟოზეფ ბორელმა.
23 მაისს Ryanair-ის თვითმფრინავი, რომელიც ათენიდან ვილნიუსში რეისს ასრულებდა, ბორტზე ბომბის არსებობის შესახებ შეტყობინების გამო მინსკში დაეშვა. მოგვიანებით გაირკვა, რომ ეს ინფორმაცია არ დადასტურდა. ამასთან, რეისის ერთ-ერთი მგზავრი, ოპოზიციურად განწყობილი ბელარუსი ჟურნალისტი, რომან პროტასევიჩი დააკავეს.
