გერმანიიდან საქართველოში სასჯელაღსრულების N6 დაწესებულების რეჟიმის განყოფილების ყოფილი უფროსის, ვლადიმერ კაპანაძის, ექსტრადიცია განხორციელდა. ამის შესახებ ინფორმაციას პროკურატურა ავრცელებს.
ვლადიმერ კაპანაძე სასჯელაღსრულების N 6 დაწესებულების რეჟიმის განყოფილების უფროსის თანამდებობას 2007 წლის 26 ივნისიდან 2012 წლის 20 ნოემბრამდე იკავებდა.
სასამართლოს გამამტყუნებელი განაჩენით, კაპანაძე მსჯავრდებულია პატიმართა მიმართ განხორციელებული წამებისთვის, დანაშაული გათვალისწინებული საქართველოს სისხლის სამართლის კოდექსის 144¹-ე მუხლით, რისთვისაც განსაზღვრული აქვს 8 წლითა და 3 თვით თავისუფლების აღკვეთა.
„[ვლადიმერ კაპანაძემ] პირთა ჯგუფთან ერთად, შეიმუშავა მსჯავრდებულთა მიმართ მოპყრობის არაკანონიერი მეთოდები, რომელიც მიზნად ისახავდა მათ მიმართ წამებასა და არაადამიანურ მოპყრობას და თანამშრომლებთან ერთად ეწეოდა პატიმრების სისტემატურ ცემასა და წამებას“, – აცხადებს პროკურატურა.
“ნეტგაზეთი”