“ჩემზე გაიწია დასარტყმელად“ – წულუკიანი კრივის ფედერაციის პრეზიდენტს ფიზიკური შეურაცხყოფის მცდელობაში ადანაშაულებს.
კულტურის მინისტრის თეა წულუკიანის განცხადებით, კრივის ფედერაციის პრეზიდენტმა დავით წიკლაურმა მასზე ფიზიკური შეურაცხყოფის მისაყენებლად გაიწია. როგორც წულუკიანმა აღნიშნა, ამ ფაქტს არ შეუშლია მისთვის ხელი, რომ ფედერაციას გაუწიოს სათანადო დახმარება.
მისი თქმით, ელოდა, რომ კრივის ფედერაციის ხელმძღვანელი თავად გადადგამდა შესაბამის ნაბიჯს, თუმცა ის ასე არ მოიქცა.
„ის ადამიანი, ვინც ჩემზე გაიწია დასარტყმელად, ეს არის კრივის ფედერაციის ხელმძღვანელი, მაგრამ ეს არავითარ შემთხვევაში არ ნიშნავს იმას, რომ ეს ქმედება ჩემს გონებაში ან განწყობაში გადამაქვს მოკრივეზე ან კრივის სახეობაზე. მათ იმხელა შედეგები აჩვენეს წელს, რომ მხოლოდ მადლობას იმსახურებენ. სულ რამდენიმე დღის წინ ჩვენი ახალგაზრდა მოკრივეები დავაფინანსეთ, ოღონდ ფედერაციის გვერდის ავლით. ამას ჩვენ გავაგრძელებთ. ჩვენ ქართულ კრივს, იმიტომ, რომ მათ არ გაუმართლათ ხელმძღვანელობაში, ხელს არ გავუშვებთ.
მქონდა იმედი, რომ რაღაც ტიპის ნაბიჯი იქნებოდა. მე რაღაც დავაშავე და არ დავაზიანო ხელმძღვანელად ჩემი არსებობით, სპორტის სახეობა… მან ეს ვერ გაიგო. ჩვენ ამის გამო ვერ გავჩერდებით. გარკვეული ფორმა, რომელიც იანვრამდე იმოქმედებს, ვიპოვეთ, რომ მაინც დავაფინანსოთ კრივი და არა კონკრეტული პირის ჯიბე, რომელმაც ვერ გაიგო, სად მუშაობს. ეს მისი გამოქანება დასარტყმელად მოჰყვა იმას, რომ ითხოვდა ფულს. როდესაც მიიღო პასუხი, რომ ეს შეუძლებელია ახლა – „მოდი, ვიმუშაოთ, გამოაგზავნეთ, რა გაქვთ საჭიროებები და ვიმსჯელებთ“ – მან გააგრძელა შეურაცხყოფა ჩემი მოადგილის. დეტალები ჩემთვის საინტერესო არ არის.
რაც ჩემთვის ნიშანდობლივი იყო, მე, როგორც ქალი, ამ ასაკში პირველად აღმოვჩნდი ასეთი რაღაცის წინაშე. იმიტომ რომ მართლა, შეიძლება უცნაურად ჟღერს, მაგრამ ძალიან ქართულ ოჯახში გავიზარდე და ისეთი კაცები იყვნენ ჩემს გარემოცვაში – მამა, ბაბუები, ძმა – რომ წარმოუდგენელი, ასე ვთქვათ, პირობები იყო, ყველა იყო თანასწორი. არ მახსოვს ვიღაცას ეგრძნობინებინოს ჩემთვის, მით უმეტეს, მთიელები არიან ჩემს ოჯახში, რომ მე, როგორც ქალი ვარ სადღაც. პირიქით. შესაბამისად, ეს იყო ჩემთვის ძალიან დიდი სიურპრიზი.
ყველა ქალმა უნდა იცოდეს, რომ არაფერი გასაკვირი არ არის იმაში, რომ მეც კი, მინისტრი ვარ, ვიცე-პრემიერი მქვია, ასე ვიცი, რაღაცას ვმართავ – მგონია და „მსხვერპლის ბრალი იყო“ – თურმე, მან ეს შეეცადა. ეს არის თავისთავად ნიშანდობლივი, რომ ვინც არ უნდა იყო, მაინც „შენი ბრალი იქნება“, შეეცდებიან… ამას ჩვენ არ უნდა შევეგუოთ. მე არ ვეგუები. ჩვენ ვნახავთ ცოტა ხანში, სად იქნება ის და სად ვიქნები მე. მე მუშტი არ მაქვს მოკრივეს ვაჯობო, მაგრამ ქართული კრივი, რომ არ დაიღუპება, ამას ვნახავთ“ – განაცხადა წულუკიანმა.
წყარო: pia.ge