ე. წ. “არასამთავრობო სექტორი” ისტერიკას არ წყვეტს (და არც შეწყვეტს!) და აგრძელებს პოლიტიკური ტემპერატურის აწევას. მათ ულტიმატუმი წაუყენეს ასევე გაჯიუტებულ ხელისუფლებას, ე. წ. “რუსულ კანონთან” დაკავშირებით. ყველაფრის მამოძრავებელი ღერძი რუსოფობია და ვლადიმირ პუტინისგან მომდინარე მითიური “საფრთხეა”.
ინფორმაცია:
„ვაჩერებთ ხელისუფლებასთან თანამშრომლობას – არასოდეს, არავითარი ფორმით არ დავრეგისტრირდებით ღირსების შემლახავ რეესტრში,“ – ამის შესახებ არასამთავრობო და მედია ორგანიზაციების მიერ გავრცელებულ განცხადებაშია აღნიშნული.
„ვაჩერებთ ხელისუფლებასთან თანამშრომლობას, სანამ ხელისუფლება რუსულ კანონს არ გაიხმობს;
ვაცხადებთ, რომ არასოდეს, არავითარი ფორმით არ დავრეგისტრირდებით ღირსების შემლახავ რეესტრში;
მოვუწოდებთ ყველას, 28 აპრილს, კვირას, 19:00 საათზე, შევიკრიბოთ რესპუბლიკის მოედანზე, რუსული კანონის წინააღმდეგ. ასევე მოვუწოდებთ შეკრებისკენ ყველას, თუკი ჩაინიშნება მეორე პლენარული განხილვა.
სიტყვის გატეხითა და რუსული კანონის ხელახლა განხილვით, უდავოა, რომ ხელისუფლება გადის კონსტიტუციური ჩარჩოდან და ცვლის ქვეყნის საგარეო კურსს. ეს ქართველი ხალხის ურყევი ნების (2008 წლის გაყალბებული პლებისციტის შედეგები – რედ.) ღალატია. არ დარჩენილა სოციალური ფენა, პროფესიული თუ საზოგადოებრივი ჯგუფი, რომელსაც გასულ დღეებში, ხელისუფლებისთვის რუსული კანონის გაწვევა არ ეთხოვა. მეცნიერები, სტუდენტები, ექიმები, კულტურისა და სპორტის წარმომადგენლები, მეღვინეები, მეწარმეები, ფერმერები და სხვა ჯგუფები, დღეს ერთად დგანან ისტორიის სწორ მხარეს.
ასევე, ყველა საერთაშორისო პარტნიორის: ევროკავშირის, ნატოს, გაეროს, ევროსაბჭოსა და მეგობარი ქვეყნის განცხადებით, რუსული კანონი გვაშორებს ევროკავშირს. რუსული კანონის განხილვა და მიღება ანტიკონსტიტუციური ნაბიჯია, რომელიც ყველა მოქალაქეს ეხება, კლავს ქართულ დემოკრატიას და რუსეთთან პირისპირ გვტოვებს.
აქედან გამომდინარე, ჩვენ უარს ვამბობთ: ა) ხელისუფლების წარმომადგენლებთან ერთად შეხვედრებში მონაწილეობაზე; ბ) სამუშაო ჯგუფებსა და მრჩეველთა საბჭოებში მუშაობაზე გ) საერთაშორისო თუ სხვა სამუშაო ფორმატებში ხელისუფლებასთან კოორდინაციაზე.
ჩვენ ვმუშაობთ მხოლოდ ხალხისთვის. ჩვენ ვემსახურებით მხოლოდ ხალხს და გავაგრძელებთ მუშაობას ბავშვების, ქალების, მშრომელების, შშმ პირებისა და სხვა დაუცველი ჯგუფების უფლებების დასაცავად.
სწორედ ამ ხალხის 80%, განსაკუთრებით კი საჯარო მოხელეები, მხარს უჭერენ და შრომობენ, რათა საქართველო გახდეს ევროკავშირის სრულფასოვანი წევრი. ქართულ ოცნება კი, ამ ხალხს აიძულებს, მათივე სურვილის საწინააღმდეგოდ, მონაწილეობა მიიღოს 29 აპრილს დაგეგმილ მთავრობის რუსულ მარშში. მთავრობის რუსული მარშით, ხელისუფლება ცდილობს წარსულში დაგვაბრუნოს, მაშინ როცა, ჩვენი მომავალი ევროპაშია. ხელისუფლება უპირისპირდება შვილებს, მომავალ თაობებს, საჯარო მოხელეებსა და ამ ქვეყნის ევროპული მომავლის მხარდამჭერ აბსოლუტურ უმრავლესობას.
ჩვენი და ქართველი ხალხის პასუხი კი არის:
არასოდეს ვიცხოვრებთ პუტინის წესებით. რუსული კანონი არასოდეს იქნება ქართველი ხალხის არჩევანი.
კი ევროპას! არა რუსულ კანონს!
განცხადება ღიაა შემოერთებისთვის ნებისმიერი ორგანიზაციისა და მედიისთვის,“ – აღნიშნულია განცხადებაში.
პეტიციას ამ ეტაპზე ხელს 126 ორგანიზაცია აწერს, მათ შორის არიან: საერთაშორისო გამჭვირვალობა – საქართველო; ა(ა)იპ “ადამიანის უფლებების განვითარების ფონდი“; ა(ა)იპ ,,მართლმსაჯულების სახლი”; დემოკრატიის კვლევის ინსტიტუტი (DRI); ინფორმაციის თავისუფლების განვითარების ინსტიტუტი (IDFI); მედიაომბუდსმენი; მწვანე ალტერნატივა; საია; საქართველოს ჟურნალისტური ეთიკის ქარტია და ა.შ. – ინფორმაციის დასასრული.
ჩვენ შემოგთავაზეთ ეს ტექსტი, რათა ამჟამინდელი ხელისუფლების კრიტიკასთან ერთად, არ დაგვავიწყდეს, თუ ე. წ. არასამთავრობო სექტორის სახით რა უპრინციპო მტერი ჰყავს საქართველოს (მათი უმრავლესობის სახით – ყველას არ ვგულისხმობთ). მათ ღირსება მხოლოდ მაშინ ახსენდებათ, როდესაც მათსავე მერკანტილურ ინტერესებს საფრთხე ექმნება. ისინი ისეთივე ყრუნი არიან ქართველი ხალხის სასიცოცხლოდ მნიშვნელოვანი პრობლემების მიმართ, როგორც ქოცები და ნაცები. ევრო-ამერიკული გრანტების დაკარგვის შიშია მათი ერთადერთი მამოძრავებელი ძალა.
ნამდვილად შესაცვლელია ყველაფერი, “არასამთავრობო სექტორის” ჩათვლით. თუმცა აქვს კი საქართველოს ამის რესურსი? – საკითხავი ეს არის.